काठमाडौं । सरकारले आर्टिफिसियल इन्टेलिजेन्स नीतिको ४ उद्देश्य राखेर मस्यौदा तयार गरेको छ। सञ्चार तथा सूचना प्रविधि मन्त्रालयले सुझाव माग गर्दै मस्यौदा सार्वजनिक गरेको हो।
नीतिमा सुरक्षित एवं दिगो एआई इकोसिस्टमको निर्माण गर्नेलाई प्राथमिकता दिइएको छ। एआईको क्षेत्रमा जनशक्ति विकास, अध्ययन, अनुसन्धान, नवप्रवर्तन र उद्यमशीलताको विकास गर्ने उल्लेख गरेको छ।
तेस्रोमा एआईको प्रयोगमार्फत क्षेत्रगत विकास र सार्वजनिक सेवाको गुणस्तरमा सुधार गर्नु र एआई विकास एवं सुरक्षित प्रयोगको लागि समन्वय, सहकार्य, नियमन र अनुगमन गर्नु रहेको छ।
नीतिअनुसार नवप्रवर्तन र उद्यमशीलताको प्रवर्द्धन, विद्यमान संरचनाहरूको सबलीकरण एवं क्षेत्रगत समन्वय र सहकार्यमार्फत कुल गार्हस्थ्य उत्पादनमा एआई क्षेत्रको योगदान बढाउने लक्ष्य राखिएको छ।
